BRUTAL

Nang iginupo ka ng balang sa malapitan sa iyo ay ibinuga

Pumunit sa ala-ala ng isang bansa ang nag-aapoy na tingga

Biniyak ang bungo mo upang sa likod ng dati mong mukha makita

Ang poot ng bayang para sa kaligtasan kaya ka doon ay ipinadala

Marami kayo, napakarami upang bilangin pa

Kapalit ng isang kaaway, marami ang inyong inulila

Napakamahal naman ng singil upang ialay mo sa kanila

Pagbawi sa dangal na nabahiran, sa iyo pa iniasa

Kaaway ang kumiitl sa iyo, yan ang laman ng balita

Subalit sinong kaaway ba ang tinutukoy nila

Sino ba ang brutal na pumaslang sa iyo, sino, magsalita ka

Sila ba na bumaril sa iyo ang salarin talaga?

May galit na gumagapang sa kamalayan ng maraming taumbayan

May luhang umaagos, pagtangis na kumakawala sa napakaraming libingan

May poot na nagsasakdal sa kapabayaan ng isip-batang may kasalanan

Dahil brutal kang pinaslang hindi ng kaaway kundi ng pinuno ng bayan.