Mga koronang yari sa alambreng tinik ang gamit
Sa duguang katawan mga hampas humahagupit
Paglalakad na naka-paa sa maiinit na lansangan
Habang ang krus na mabigat sa balikat pasan-pasan.
Mga babaeng nakatakip ng itim ang mukha
Lungkot at lagim ang kanilang dala-dala
Panakot sa mga batang makakasalubong nila
Laman ito ng kilabot sa aking ala-ala.
Tahimik ang lahat, bawal makinig ng musika
Hindi pwedeng tumawa, papaluin ka ni lola
Dasal at pagtitika, hindi ang pagsasaya
Uuwi hindi para magbakasyon kundi para manampalataya.
Penitensya ang hagupit sa duguang laman
Penitensya ang krus na pinapasan
Penitensya ang maglakad ng nakapaa sa initan
Penitensya ang puwersadong katahimikan.
Subalit ang panahon ngayon ay iba na
Mga hindi gumagalaw na sasakyan na ang penitensya
Mga naagnas na pampaganda, mga nauubos na gasolina
Ang penitensya ngayon ay ang magkaroon ng mahabang pasensya.
Handang suungin mga sasakyang nagsiksikan sa tila parking lot na mga lansangan
Mga bus, eroplano at barko na punuan, mga paghihintay ng mga walang masakyan
Tinitiis ang tagaktak ng pawis, ang paghihintay sa mga pilang tila walang katapusan
Nagpepenitensya hindi para manampalataya kundi para sa bakasyon at kasiyahan.
Comentários